රිජ්වේ ආර්යා ළමා රෝහල වෙත උපකරණ පරිත්‍යාග කරමින් ශ්‍රීලංකන් කෙයාර්ස් ලෝක ළමා දිනය සමරයි
ශ්‍රීලංකන් ගුවන් සේවයේ ආයතනික සමාජ වගකීම් අංශය වන ශ්‍රීලංකන් කෙයාර්ස් ලෝක ළමා දිනය වෙනුවෙන් කොළඹ රිජ්වේ ආර්යා ළමා රෝහල වෙත වෛද්‍ය උපකරණ කිහිපයක් පරිත්‍යාග කරන ලද බව පවසයි.
සෞඛ්‍ය සම්පන්න පරම්පරාවක් පෝෂණය කිරීමේ වැදගත්කම ගුවන් සමාගම අවබෝධ කර ගෙන අතර ළමා සෞඛ්‍යාරක්‍ෂණය සහ යහපැවැත්ම සඳහා ද ශ්‍රීලංකන් කෙයාර්ස් විවිධ පියවරයන් රැසක් දැනටමත් ගෙන තිබේ.
ඒ අනුව, හෘද රෝගවලින් පෙළෙන ළමුන් සඳහා මෙරට ඇති එකම තෘතීය සත්කාරක මධ්‍යස්ථානය වන රිජ්වේ ආර්යා රෝහලේ ළමා හෘද රෝග ඒකකයට infusions pumps පරිත්‍යාගයක් ශ්‍රීලංකන් කෙයාර්ස් විසින් සිදු කරන ලදී.
මේ පිළිබඳව අදහස් දක්වමින් රිජ්වේ ආර්යා රෝහලේ, ළමා හෘද රෝග පිළිබඳ උපදේශක, වෛද්‍ය දුමින්ද සමරසිංහ මහතා මෙසේ පැවසීය. “ලෝක ළමා දිනය වෙනුවෙන් රිජ්වේ ආර්යා ළමා රෝහලේ ප්‍රතිකාර ලබන දරුවන්ගේ ප්‍රයෝජනය සඳහා අත්‍යවශ්‍ය වෛද්‍ය උපකරණ පරිත්‍යාග කිරීමට ඉදිරිපත් වූ ශ්‍රී ලංකන් ගුවන් සමාගමට අපි ස්තූතිවන්ත වෙනවා. විශේෂයෙන් පැතිර යන වසංගතය හේතුවෙන් රටේ සෞඛ්‍ය සේවා ප්‍රයත්‍වයන්ට සහය දැක්වීමට ජාතික ගුවන් සේවය ඉදිරිපත් වීම ඇත්තෙන්ම ප්‍රශංසනීය යි. ”යනුවෙන් ඒ මහතා වැඩිදුටත් පැවසීය.
ශ්‍රීලංකන් ගුවන් සමාගමේ ප්‍රධාන විධායක නිලධාරී විපුල ගුණතිලක මහතා ප්‍රකාශ කළේ සිය සාමාජිකයින් ලෝක ළමා දිනයේ දී සිදු කරන මෙම පරිත්‍යාගය තුළින් රටේ සෞඛ්‍ය සේවා අංශය ඉහළ නැංවීමට මෙන්ම වෛද්‍ය පහසුකම් අවශ්‍ය දරුවන් සඳහා ලබා දෙන අඛණ්ඩ සත්කාරය පෙන්නුම් කරන බවයි. එසේම මෙම පරිත්‍යාග ශ්‍රීලංකන් ගුවන් සමාගමේ කාර්ය මණ්ඩල සාමාජිකයින්ගේ සාමූහික දායකත්වයෙන් ලබා දීම විශේෂත්වයක් බවත් පවතින දුෂ්කරතා හා අභියෝග මධ්‍යයේ වුවද ලෝකයේ වෙනසක් ඇති කිරීමට ඔවුන් සියලුම දෙනා වෙහෙසෙන බවද ඒ මහතා පෙන්වා දුන්හ.
කොවිඩ් -19 වසංගතය ආරම්භ වූ දා සිටම, කොළඹ ජාතික රෝහලට, BI-level ventilators යන්ත්‍ර කිහිපයක් පරිත්‍යාග කිරීම ඇතුළුව රෝහල් සඳහා අත්‍යවශ්‍ය වෛද්‍ය ආධාර පරිත්‍යාග කිරීම සඳහා ගුවන් සේවයේ සමාජ සත්කාරක අංශය කටයුතු කර තිබේ. ශ්‍රීලංකන් කෙයාර්ස් ලිට්ල් හාර්ට්ස් ව්‍යාපෘතිය සමඟද සහයෝගයෙන් කටයුතු කරයි.
Visits: 83
