කිරිගොවීන්ට අත්වැලක් වෙමින් පැල්වත්ත සත්ව ආහාර නිෂ්පාදන ක්‍රියාවලිය සාර්ථකව ඉදිරියටත්
පැල්වත්ත කිරි සමාගම මගින් සිදු කරන ගව ආහාර නිෂ්පාදන කටයුතු ඉතාමත් සාර්ථක අන්දමින් ඉදිරියටත් පවත්වාගෙන යන බව එම සමාගම සඳහන් කරයි.
මේ හරහා මව්බිමට වටිනා විදේශ විනිමයක් ඉතිරිකරනු ලබන අතරම නැවුම් රසයෙන් යුත් ගුණාත්මක නිෂ්පාදන පෙළක් පාරිභෝගිකයන්ට ලබා දීමටත් සමත්ව ඇතැයි සමාගමේ අදහස වී තිබේ.
සමාගම මෙලෙස ස්වයං ගව ආහාර නිෂ්පාදන කටයුතු ආරම්භ කරන ලද්දේ 2009 වසරේ සිටයි. ගත වුණු කාලය පුරාම කිසිදු වෙනසකින් තොරව ගව ආහාරවල ගුණාත්මකභාවය එකසේ පවත්වා ගැනීමටද ඔවුන් සමත් වී ඇත.
විශේෂයෙන්ම කිරි ගවයින්ට ලබා දෙන ආහාර අනුව ඔවුන් ලබා දෙන කිරිවල ප්‍රමාණය සහ ගුණාත්මකභාවය වෙනස් වන බැවින් ඒවා සාමාන්‍ය ගවයන්ට ලබා දෙන ආහාර සමඟ සැසඳිය නොහැක.
මේ හේතුවෙන් කිරි ගවයින්ගේ ආහාර සැකසීමට පෙර ඔවුන්ගේ ශරීර බර, ජීවන චක්‍ර අවධිය, ලබා දෙන වියළි ආහාර සහ දියර ආහාර ප්‍රමාණයන් යන අංශ කෙරෙහි පැල්වත්ත සුවිශේෂී අවධානයක් යොමු කරන බවත් සමාගම පවසයි.
මේ සම්බන්ධයෙන් අදහස් දක්වන පැල්වත්ත සත්ව ආහාර නිෂ්පාදන අංශයේ, පෝෂක නිෂ්පාදන මධ්‍යස්ථානය භාර ජ්‍යෙෂ්ඨ විධායක යාන්ත්‍රික ඉංජිනේරු පී.ඒ.පී. කුමාර මහතා, “කිරි ගවයාට ලබා දෙන වියලි ආහාර, එම සත්වයාගේ ඵලදායිතාව ඉහළ නැංවීමට සහ පාරිභෝගිකයාට වඩාත් රසවත් කිරි ලබාදීමට ප්‍රධාන සහ වැදගත් සාධකය වන බව පැල්වත්ත අපි හඳුනාගෙන තියෙනවා. සත්ව නිෂ්පාදන හා සෞඛ්‍ය දෙපාර්තමේන්තුවෙහි ලියාපදිංචියත් සමඟ ඔවුන්ගේ අනුග්‍රහය යටතේ පැල්වත්ත නිෂ්පාදන මධ්‍යස්ථානවල ඇති උසස් තත්ත්වයේ ගව ආහාරවල, අමුද්‍රව්‍ය යෙදවුම්වල සිට අවසාන නිෂ්පාදිතය දක්වා ක්‍රියාකාරිත්වය සිදුවෙනවා. මෙසේ දේශීයව නිෂ්පාදනය කරනු ලබන උසස් තත්වයේ ගව ආහාර තුලින් අපගේ කිරි නිෂ්පාදනයන්හි ගුණාත්මකභාවය වඩා වර්ධනය වන බව මම විශ්වාස කරනවා”
ඒ මහතා පවසන ආකාරයට අද වනවිට මෙම සත්ව ආහාර නිෂ්පාදන මධ්‍යස්ථානයෙහි දිනකට මෙට්‍රික් ටොන් 60 ක සැලසුම්ගත ධාරිතාවකින් යුත් ගුණාත්මක සත්ව ආහාර ප්‍රමාණයක් නිපදවීමේ හැකියාව පවතී. එසේම එම මධ්‍යස්ථානය මගින් ශ්‍රී ලංකාව තුළ සෑම මසකම මෙට්‍රික් ටොන් 300කට වැඩි ගව ආහාර නිෂ්පාදනයක් සිදු කරන අතරම මෙම ආහාර සමාගමේ කිරි සැපයුම්කරුවන් වෙත ලබාදීම සිදු කරයි.
පැල්වත්ත සත්ව ආහාර නිෂ්පාදන ක්‍රියාවලියේදී ප්‍රථමයෙන් ම ඉරිඟු සහ සහල් වැනි අමුද්‍රව්‍ය හොදින් සේදීමට ලක්කරන අතර පසුව ඒවා කාණ්ඩ වලට වෙන්කිරීමෙන් අනතුරුව අනෙකුත් කුඩා අමුද්‍රව්‍ය එකතු කිරීම සිදුවේ.
ඉන් අනතුරුව සිදු වන්නේ මිශ්‍ර කිරීමේ ක්‍රියාවලිය වන අතර, මිශ්‍ර කිරීම අනුව අවසාන නිෂ්පාදිතයේ ගුණාත්මකභාවය තීරණය වන බැවින් මිශ්‍ර කිරීමේ ක්‍රියාවලියට වැඩි අවධානයක් යොමු කිරීම සිදු වේ. කැට ගැසීම, තොගයෙහි ඝනත්වය සමානුපාත කිරීම සහ මිශ්‍රණ කාලය අතර නිවැරදිබව යන කරුණු මත හොඳ මිශ්‍රණයක් නිර්මාණය වීම තීරණය වේ.
පසුව මිශ්‍රණය ඇඹරීම මගින් කුඩු බවට පත් කරන අතර ඉන් අනතුරුව එයට උක් පැණි එක්කරනු ලබයි. ඉන් පසු මෙම අමුද්‍රව්‍ය මිශ්‍රණය සෙල්සියස් අංශක 85 කදී තත්ත්පර 15ක් පුරා පිසගනු ලැබේ. අවසානයේදී සිදු වන්නේ මිශ්‍රණය සිසිල් කිරීමය. සිසිල් කිරීමෙන් අනතුරුව පෙරීමකට භාජනය කරන අතර එයින් තෝරාගන්නා සුදුසු කොටස් පමණක් ඇසුරුම් කිරීමේ මධ්‍යස්ථානය වෙත යොමු කරනු ලබයි.
මේවායේ ගුණාත්මකභාවය පවත්වා ගැනීම සඳහා මෙන්ම පිරිවැය අඩු කිරීම සඳහා, තෙතමනය පාලනය කිරීමක් සිදු කරනු ලැබේ.
පැල්වත්ත සමාගමේ ආහාර නිෂ්පාදන මධ්‍යස්ථානයේදී ප්‍රධාන වශයෙන් ගව සාන්ද්‍ර ආහාර වර්ග තුනක් නිෂ්පාදනය කරයි. “Pelwatte High Yielding Feed” යනු ඉහළ අස්වැන්නක් සහිත කිරි ගවයින් සඳහා සාන්ද්‍ර ආහාර වන, පරිවෘත්තීය ශක්තිය (Metabolizable energy) 2600-2750 අතර වන, ප්‍රෝටීන් (16-17%) සහ මේදය (5-7.5%) අඩංගු ආහාර වේ. “Pelwatte General Feed” යනු සාමාන්‍ය අස්වැන්නක් ලබා දෙන ගවයින් සඳහා සාන්ද්‍ර ආහාර වන අතර ඒවායේ පරිවෘත්තීය ශක්තිය (2450-2550), ප්‍රෝටීන් (13.5-14%) සහ මේදය (5-7.5%) අඩංගු වේ. “Pelwatte Calf Feed” යනු පරිවෘත්තීය ශක්තිය (2800-2950), ප්‍රෝටීන් (18-18.5%) සහ මේදය (5-7.5%) වැනි ඉහළ අනුපාත සහිත පැටවුන් සඳහා සාන්ද්‍ර ආහාර වේ.
ජ්‍යෙෂ්ඨ විධායක පී.ඒ.පී. කුමාර මහතා තවදුරටත් සිය අදහස් දක්වමින් කියා සිටියේ “High yield feed යනු ඉහළ ප්‍රෝටීන් සහිත සාන්ද්‍ර නිෂ්පාදනයක්. එය සාමාන්‍යයෙන් වැඩි කිරි ප්‍රමාණයක් නිපදවන එළදෙනුන් සඳහා අත්‍යවශ්‍යම ආහාරයක්. පැල්වත්ත සමාගම විසින් ඉහළ නිෂ්පාදනයක් ඇති කිරි ගවයින්ව, ඔවුන්ගේ සෞඛ්‍යය මෙන්ම කිරි නිෂ්පාදනයද කාර්යක්‍ෂම ලෙස පවත්වා ගැනීමට ඉඩ සැලසීම සඳහා ආහාර පරිමාව අඛණ්ඩව වැඩි කිරීමේ සැලැස්මක් මත පෝෂණය කරනවා. අපගේ නිෂ්පාදන ක්‍රියාවලියේදී අප භාවිතා කරන අමුද්‍රව්‍ය අතර බඩඉරිඟු, තිරිඟු නිවුඩ්ඩ, සෝයා බෝංචි, ඩීසීපී, ලුණු, දෙහි, සහල්, පරිප්පු සහ පරිප්පු නිවුඩ්ඩ, පොල් පුන්නක්කු, පොහොර සහ සහල් සන්නාමයක් වන ඩී – ඔයිල් අඩංගු වෙනවා. වැදගත් කරුණක් නම් පැල්වත්තේ කිරි ගව ආහාර නිෂ්පාදනය කරනු ලබන්නේ දේශීය අමුද්‍රව්‍ය මත වීමයි. මෙය කුඩා පරිමාණ ආහාර ද්‍රව්‍ය නිෂ්පාදන කර්මාන්තයට සහාය වීම සඳහා ය. පැල්වත්ත විසින් අවස්ථා ගණනාවකදී රට පුරා සිටින ගව ගොවීන්ගේ විශේෂ අවශ්‍යතා සපුරාලීමට කටයුතු කර තිබෙනවා”
සාමාන්‍ය නිෂ්පාදන මට්ටම් ඇති කිරි එළදෙනුන්ට සහ පිරිමි ගවයින්ට “General feed” කාණ්ඩයේ ආහාර ලැබෙන අතර, පරිණත ගවයින්ගේ ඝන ආහාරවලට සාපේක්ෂව පැටවුන්ට විශාල දියර ආහාර වේලක් ලබා දෙනු ලැබේ. තවද, පැටවුන් වර්ධනය වන විට ඔවුන්ගේ ප්‍රෝටීන් ඉල්ලුම වැඩි වන බැවින් ඔවුන්ට සෝයා සහ අනෙකුත් ධාන්‍ය මත පදනම් වූ ආහාර ලබා දේ.
උසස් තත්ත්වයේ කිරි යෙදවුම් පවත්වා ගැනීම සඳහා සමාගමට සහයෝගය ලබා දෙන එහි ප්‍රධාන සැපයුම් දාමය වන ගොවීන්ව අඛණ්ඩව ඇගයීමට ලක් කරයි. පැල්වත්ත සමාගම මේ වනවිට ශ්‍රී ලංකාවේ කිරි ගොවීන් විශාල සංඛ්‍යාවකට සිය අත්වැල සපයනු ලබයි.
Visits: 94
