අප්‍රේල් මාසය සඳහා සාර්ථක ආරම්භයක් පෙන්වයි

අප්‍රේල් මාසයේ පළමු දිනය ලෙස ඊයේ (අප්‍රේල් 01දා) දිනයේදීද කොළඹ කොටස් හුවමාරුවෙහි ගනුදෙනු තුළ කැපී පෙනෙන වර්ධනයක් පෙන්නුම් කෙරිණි. විශේෂයෙන්ම මේ වසරේ පළමු මූලික මහජන කොටස් නිකුතුව සඳහා අටගුණයක අධිඉල්ලුමක් හිමිවීමත්, ටයිල් සමාගම් තුළ කොටස් අතුරු බෙදීමෙන් අනතුරුව සිදු වුණූ ගනුදෙනුත් මෙම වර්ධනය සඳහා හේතුව වූ බව කොටස් තැරැව්කාර සමාගම් පවසයි.

එහිදී වෙළෙඳ පොළෙහි තනි පුද්ගල ආයෝජකයන් තුළ වැඩි වශයෙන් විවිධාංගීකරණය වූ සමාගම් වෙත මෙන්ම නිෂ්පාදන අමුද්‍රව්‍ය අංශයේ සමාගම් වෙත වැඩි කැමැත්තක් දැකගත හැකි වූ බවත් එම සමාගම් සඳහන් කරයි.

ඒ අනුව අද දිනයේදී ඒකක 7,124.79ත් ඒකක 7,222.21ත් අතර අගයක විචලනයක් පෙන්වූ සියලු කොටස් මිල දර්ශකය (ASPI) දිනය නිමා වනවිට ඒකක 7,193.28 ක් බවට පත්විය. එය පෙරේදා (මාර්තු 31) දිනයට සාපේක්ෂව ඒකක 72.00 ක් එනම් +1.01%ක ඉහළ යාමක් පෙන්නුම් කර ඇත.

පෙර සිදු කළ සාකච්ඡාවලට අනුව ජෝන්කීල්ස් හෝල්ඩිංස් පීඑල්සී තුළ සිදු වූ ගනුදෙනු දිනයේ පිරිවැටුමෙන් 1.9%ක් සඳහා දායකත්වය ලබා දී ඇත.

අද දිනයේ සිදු වූ සමස්ත ගනුදෙනු අතර සමාගම් 119ක මිල ගණන් ඉහළ ගිය අතර, සමාගම් 47ක මිල ගණන් පහළ ගොස් තිබේ.

මෙහිදී සියලු කොටස් මිල දර්ශකයේ විචලනය සඳහා වැඩිම දායකත්වය සැපයූ සමාගම් වූයේ ලයන් බ්‍රවුන්ස් ඉන්වෙස්ට්මන්ට්ස් පීඑල්සී BIL (+6.58), එක්ස්පෝ ලංකා හෝල්ඩිංග්ස් පීඑල්සී EXPO (+5.82), ජෝන් කීල්ස් හෝල්ඩිංග්ස් පීඑල්සී JKH (+4.53), හේලීස් පීඑල්සී HAYL (+4.46), වැලිබල් වන් පීඑල්සී VONE (+4.43), ඩිස්ටිලරීස් කම්පැනි ඔෆ් ශ්‍රී ලංකා DIST (-2.11), ඩයලොග් ආසිආටා පීඑල්සී DIAL (-1.87), නෙස්ලේ ලංකා පීඑල්සී NEST (-1.6), සිංගර් (ශ්‍රී ලංකා) පීඑල්සී SINS (-1.29), ලංකා හොස්පිටල්ස් කෝපරේෂන් පීඑල්සී LHCL (-1.13) යනාදී සමාගම්ය.

ස්ටෑන්ඩර්ඩ් ඇන්ඩ් පුවර්ස් ශ්‍රී ලංකා 20 දර්ශකයත් දවසේ ගනුදෙනු නිමාවේදී ඒකක 2,867.72 ක අගයක් ගත් අතර, එය පෙරේදා (මාර්තු 31) දිනයට සාපේක්ෂව ඒකක 17.60 ක එනම් -0.62%ක ඉහළ යාමක් වාර්තා කර ඇත.

මෙහිදී දිනයේ සමස්ත පිරිවැටුම රුපියල් බිලියන 1.54ක් ලෙස සටහන්ව තිබූ අතර, එය පෙරේදා (මාර්තු 31) වාර්තා කළ රුපියල් මිලියන 777.89ට සාපේක්ෂව 98% ක ඉහළ යාමකි. එහිදී විදේශීය ආයෝජකයන් දිනයේ වැඩිම අලෙවිකරුවන් පිරිසක් බවට පත් විය.

ඒ අනුව මේ තත්ත්වයත් සමගම දිනයේ සමස්ත වෙළෙඳ පොළ ප්‍රාග්ධනීකරණය රුපියල් ට්‍රිලියන 3.14ක අගයකට පත්ව ඇති අතර එය මේ වසරේ ජනවාරි 01 වැනිදා සිට අද දිනය දක්වා 6.15%ක ලාභයක් ලෙස සටහන්ව තිබේ.

මේ අතර, දිනයේ සමස්ත විදේශීය මිලදී ගැනීම්වල වටිනාකම රුපියල් මිලියන 14.51ක් ලෙස සටහන් විය. එසේම සමස්ත විදෙස් විකුණුම් රුපියල් මිලියන 387.19ක අගයක් ගෙන තිබේ.

දිනයේ දළ විදේශ ආයෝජන පිටතට ගලායෑම්හි වටිනාකම රුපියල් මිලියන 372.69කි. ඒ අනුව වසරේ ආරම්භයේ සිට මේ දක්වා සමස්ත විදේශ ආයෝජන පිටතට ගලායාම්හි වටිනාකම රුපියල් බිලියන 18.06ක් ලෙස සටහන්ව තිබේ.

මෙහිදී මිලදී ගැනීම් යටතේ වැඩිම දායකත්වය ස්විස්ටෙක් සිලෝන් පීඑල්සී විසින් ලබා දී ඇති අතර, එම ආයෝජන ගලාඒම්හි වටිනාකම රුපියල් මිලියන 4.17 කි. එසේම ජෝන් කීල්ස් හෝල්ඩිංග්ස් පීඑල්සී විකුණුම් යටතේ වැඩිම දායකත්වයක් ලබා දුන් අතර ඒ හරහා සිදුවූ ආයෝජන පිටතට ගලායාම්හි වටිනාකම රුපියල් මිලියන 150ක් ලෙස සටහන්ව ඇත.

මේ අතර දිනයේ සමස්ත පිරිවැටුමෙන් රුපියල් මිලියන 398ක් සඳහා ප්‍රාග්ධන භාණ්ඩ අංශය දායකත්වය ලබා දී ඇති අතර, එය ප්‍රතිශතයක් ලෙස 26% ක අගයක් ගෙන තිබේ. ආහාර, පානවර්ග සහ දුම්කොළ නිෂ්පාදන අමුද්‍රව්‍ය සහ බැංකු දෙවැනි සහ තෙවැනි ස්ථාන බවට පත්වෙමින් පිළිවෙලින් රුපියල් මිලියන 373ක සහ රුපියල් මිලියන 262ක දායකත්වයක් දිනයේ පිරිවැටුම සඳහා ලබා දී ඇත.

Visits: 330