22 වැනි DSI Supersport පාසල් වොලිබෝල් තරගාවලිය දියත් කෙරේ
DSI සමාගම විසින් 22 වන වරටත් DSI Supersport පාසල් වොලිබෝල් තරගාවලිය සංවිධානය කිරීමට කටයුතු කරන බව නිල වශයෙන් නිවේදනය කර සිටියි.
ශ්‍රී ලංකාවේ අංක එකේ පාවහන් නිෂ්පාදකයා වන DSI, ශ්‍රී ලංකා වොලිබෝල් සම්මේලනය හා අධ්‍යාපන අමාත්‍යාංශයේ පාසල් වොලිබෝල් අනුකමිටුව සමග අත්වැල් බැඳගනිමින් මෙම පාසල් වොලිබෝල් තරගාවලිය සංවිධානය කරනු ලබයි.
ග්‍රාමීය හා නාගරික පාසල් කේන්ද්‍ර කරගනිමින් වොලිබෝල් ක්‍රීඩාවේ යෙදී සිටින දක්ෂ දරුදැරියන් දිරිගන්වමින් ජාතික තලයට ඔසවා තබන්නට DSI ප්‍රධානත්වයෙන් වර්ෂ 1999 දී DSI Supersport පාසල් වොලිබෝල් තරගාවලිය ආරම්භ කෙරිණි. මෙය ශ්‍රී ලාංකීය වොලිබෝල් ක්‍රීඩා ක්ෂේත්‍රයේ කැපීපෙනෙන දියුණුවකට මග හෙළි කළ සංධිස්ථානයක් විය.
ආරම්භයෙදී ශූරතාවය සඳහා කණ්ඩායම් 198 ක් තරග වැදුණු DSI Supersport පාසල් වොලිබෝල් තරගාවලිය හරහා එදාමෙදාතුර ශ්‍රී ලංකා වොලිබෝල් ක්‍රීඩා ක්ෂේත්‍රයට දක්ෂ වොලිබෝල් ක්‍රීඩා තරු 400 කට ආසන්න ප්‍රමාණයක් හඳුන්වා දී තිබේ. මෙම වසරේ තරගාවලියට මුළු දිවයිනම නියෝජනය වන ආකාරයෙන් පාසල් වොලිබෝල් කණ්ඩායම් 4000 කට අධික ප්‍රමාණයක් සහභාගී වනු ඇතැයි අපේක්ෂා කෙරේ.
ඩී. සැම්සන් සහ පුත්‍රයෝ පුද්ගලික සමාගමේ කළමනාකාර අධ්‍යක්ෂ තුසිත රාජපක්ෂ මහතා අදහස් දක්වමින් “DSI Supersport පාසල් වොලිබෝල් තරගාවලියට වසර 22 ක් සම්පූර්ණ වෙන 2024 අවුරුද්ද අපිට විශේෂයි. ශ්‍රී ලංකාවේ වොලිබෝල් ක්‍රීඩා ක්ෂේත්‍රයේ වැදගත්ම සංධිස්ථානයක් වෙනුවෙන් DSI අනුග්‍රාහකත්වය අඛණ්ඩව ලබාදීමට හැකිවීම අප සමාගමට මහත් ගෞරවයක්. වොලිබෝල් ක්‍රීඩාව ශ්‍රී ලංකාව තුළ ප්‍රචලිත කොට සංවර්ධනය කරන්නටත් මුළු දිවයිනම ආවරණය වන ආකාරයෙන් දක්ෂ ක්‍රීඩක ක්‍රීඩිකාවන් ගණනාවක් ජාතික මට්ටමට හඳුන්වා දීමටත් DSI Supersport පාසල් වොලිබෝල් තරගාවලිය සමත්ව තිබෙනවා.” යැයි පැවසීය.
DSI Supersport පාසල් වොලිබෝල් තරගාවලිය සඳහා ඇතුලත් වීමේ අයදුම්පත් දිවයින පුරා සියළු DSI ප්‍රදර්ශනාගාර වෙතින් ලබාගත හැකිය. වැඩි විස්තර 011-2669344 අංකයෙන් ශ්‍රී ලංකා වොලිබෝල් සම්මේලනයේ දිස්ත්‍රික් 25 සම්බන්ධීකරණ නිලධාරීන් වෙතින්, 0773329702 අංකයෙන් පාසැල් වොලිබෝල් අනුකමිටු ලේඛකාධිකාරී සී. එල්. කුමාර මහතා වෙතින් හෝ asnalaka@gmail.com ඊමේල් ලිපිනයෙන් ශ්‍රී ලංකා වොලිබෝල් සම්මේලනයේ ප්‍රධාන ලේකම් ඒ. එස්. නාලක මහතා වෙතින් ලබාගත හැකිය.
DSI Supersport පාසල් වොලිබෝල් තරගාවලිය සඳහා සම්පූර්ණ කළ අයදුම්පත් ළඟම පිහිටි DSI ප්‍රදර්ශනාගාරයකට ගෙනැවිත් භාර දිය හැකි අතර අලෙවි අංශය, අංක 257, හයිලෙවල් පාර, නාවින්න, මහරගම ලිපිනයට තැපැල් මගින් එවීමද සිදු කළ හැකිය. අයදුම්පත් භාරගැනීම 2024 මැයි මස 31 දායින් අවසන් කෙරේ.
Views: 0
