DFCC බැංකුව SME ක්ෂේත්‍රයේ වර්ධනයට ‘ව්‍යාපාරික අත්වැල’ දියත් කරයි

DFCC බැංකුව මගින් ශ්‍රී ලාංකීය සමාජය තුළ ව්‍යවසායකත්වය සම්බන්ධයෙන් නව ප්‍රබෝධයක් ඇති කරමින්, දේශීය ව්‍යවසායකයින්, කුඩා හා මධ්‍ය පරිමාණ ව්‍යවසායකයින් මෙන්ම මෙම ක්‍ෂේත්‍රය හා සම්බන්ධ උනන්දුවක් දක්වන සැමගේ කුසලතා වර්ධනය කිරීමේ අරමුණින් නව ආරක වැඩසටහනක් ‘DFCC ව්‍යාපාර අත්වැල‘නමින් පසුගියදා ආරම්භ කළ බව  පවසයි.

DFCC බැංකුවේ Facebook සහ Youtube චැනලයන් ඔස්සේ විකාශනය කරනු ලබන මෙම වැඩසටහන් මාලාව හඬ සහ රූප භාවිත කරමින් සරළව මෙන්ම සැමට පහසුවෙන් වටහාගත හැකි අකාරයෙන් සැළසුම් කර ඉදිරිපත් කිරීමද විශේෂත්වයකි.

වර්තමානය වන විට රට තුළ නිර්මාණය වී ඇති වසංගත තත්ත්වය හමුවේ දේශීය ආර්ථිකයට මෙන්ම පොදුවේ සැමගේ ආර්ථිකයට ඇතිකර ඇති බලපෑම අතිමහත්ය. විශේෂයෙන් ව්‍යාපාරික ක්‍ෂේත්‍රයේ මේ වන විට නිර්මාණය වී ඇති තත්ත්වය හමුවේ රටේ ආර්ථිකයේ වර්ධනයක් අපේක්‍ෂා කිරීමට නම් ව්‍යවසායකත්වය සම්බන්ධයෙන් වැඩි අවධානයක් යොමුකල යුතු වේ.

මෙයට මනා පරිසරයක් නිර්මාණය කරමින් DFCC  බැංකුව විසින් දියත් කරනු ලබන මෙම ‘DFCC  ව්‍යාපාර අත්වැල’ වැඩසටහන මගින් කුඩා හා මධ්‍ය පරිමාණ ව්‍යාපාරිකයින් සඳහා ඔවුන්ගේ ව්‍යාපාර වඩාත් පුළුල් කර ගැනීමට දැනුම සම්පාදනය කිරීමක් සිදුකරන අතර, ව්‍යවසායකත්වය සම්බන්ධයෙන් රුචිකත්වයක් ඇති, නව ව්‍යාපාරයක් ආරම්භ කිරීමට අපේක්‍ෂාවෙන් පසුවන හෝ ඒ සඳහා සැලසුම් කරන අය වෙනුවෙන් මාර්ගෝපදේශයන්ද සපයනු ලබයි.

ශ්‍රී ජයවර්ධනපුර විශ්ව විද්‍යාලයේ, ව්‍යවසායකත්ව සහ නවෝත්පාදන මධ්‍යස්ථානයේ සභාපති වරයා මෙන්ම එම විශ්ව විද්‍යාලයේ ජ්‍යෙෂ්ඨ කථිකාචාර්ය වරයකු වන අචාර්ය රුක්මල් විරසිංහ මහතාගේ සම්පත් දායකත්වයෙන් මෙම වැඩසටහන් මාලාව ක්‍රියාත්මක වෙයි.

මෙහිදී “නිර්මාණශීලීත්වය සහ නව්‍යකරණය තුළින් ව්‍යාපාරික අවස්ථා අත්කරගැනීම, නැවුම් ව්‍යාපාරික අදහසක් සහිතව ව්‍යාපාරයක් ආරම්භ කරන්නේ කසේද, ව්‍යවසායකයකු සඳහා අවශ්‍ය මූල්‍ය කළමණාකරනය සහ මූල්‍ය සාක්‍ෂරතාවය සහ නව තාක්‍ෂණය ව්‍යවසායකයකු විසින් ව්‍යාපාරයකට යොදාගන්නේ කෙසේද?” යන තේමා ඔස්සේ මෙම වැඩසටහන් ඉදිරිපත් කර ඇත.

ව්‍යාපාරික ක්‍ෂේත්‍රය සම්බන්ධයෙන් උනන්දුවක් ඇති, එම ක්‍ෂේත්‍රය සම්බන්ධයෙන් දැනුම සෙවීමේ කාර්යයේ නිරත ඔබට මෙය මහඟු අවස්ථාවක් වනු ඇති අතර, මෙම ක්‍ෂේත්‍රය ඔස්සේ සිය අනාගත සාර්ථකත්වය සොයා යන්නන් මෙන්ම මෙම ක්‍ෂේත්‍රය හා සම්බන්ධයෙන් ඔබ තුළ ඇති ගැටළු නිරාකරණය කර ගැනීම සඳහා ද මෙය වටිනා අවස්ථාවක් වනු ඇත.

මෙම වැඩසටහන සම්බන්ධයෙන් අදහස් දක්වන DFCC බැංකුවේ ප්‍රධාන විධායක නිලධාරී ලක්ෂ්මන් සිල්වා මහතා, “DFCC ව්‍යාපාර අත්වැල’ කියන්නේ අපගේ එම දැක්මේ සුවිශේෂී අවස්ථාවක්. මෙම වැඩසටහන අපගේ ගනුදෙනුකරුවන් ඉලක්ක කරගනිමින් ක්‍රියාත්මක වැඩසටහන් පමණක් නොවේ. ව්‍යවසායක ක්‍ෂේත්‍රය සම්බන්ධයෙන් උනන්දුවක් ඇති සියලුම අයට මෙම අවකාශය විවෘතව ඇති අතර, මෙම අවස්ථාවෙන් උපරිම ඵල නෙලාගැනීම සඳහා වැඩසටහන සමග සම්බන්ධ වන ලෙසද අප ඉතා සාදරයෙන් ඉල්ලා සිටිනවා.” යනුවෙන් පවසා සිටියි.

Hits: 98