නව වසරේ මුල් දින හතරේදී සංචාරකයින් 11,380ක් මෙරටට – වැඩිම පැමිණීම් රුසියාවෙන්

2022 නව වසරේ ගෙවුණු මුල් දින හතරේ පමණක් සංචාරකයින් 11,380ක් මෙරටට පැමිණ ඇතැයි සංචාරක ඇමැති ප්‍රසන්න රණතුංග මහතා පවසයි. ඒ අනුව මෙය සංචාරක කර්මාන්තය නැංවිම සඳහා ගෙනයන වැඩපිළිවෙළේ සාර්ථකත්වය පෙන්නුම් කරන්නක් බවද ඔහු සඳහන් කරයි.

මෙහිදී වැඩිම සංචාරකයින් ප්‍රමාණයක් පැමිණ ඇත්තේ රුසියාවෙන් වන අතර එය 2,032කි. ඉන්දියානු සංචාරකයින් 1809ක්, යුක්රේන් සංචාරකයින් 1041ක්, ජර්මන් සංචාරකයින් 775ක්, එංගලන්ත සංචාරකයින් 709ක්, කසකස්තාන් සංචාරකයින් 506ක්, මාලදිවයින් සංචාරකිය්න 506ක්, ඕස්ට්‍රේලියානු සංචාරකයින් 420ක්, ප්‍රංශ සංචාරකයින් 414ක් හා පෝලන්ත සංචාරකයින් 282ක් ජනවාරි මාසයේ මුල් දින හතරේ මෙරටට පැමිණ තිබේ.

කොවිඩ් වසංගත තත්ත්වය හේතුවෙන් වඩා දැමුණු රට නැවත සංචාරකයින්ට විවෘත කිරීමෙන් පසුව 2021 වසරේ සංචාරකයින් 194,888ක් මෙරටට පැමිණ ඇත. ජනවාරි මාසයේ 1,682ක්, පෙබරවාරි මාසයේ 3,305ක්, මාර්තු මාසයේ 4,561ක්, අප්‍රේල් මාසයේ  4,161ක්, මැයි මාසයේ 1,497ක්, ජුනි මාසයේ 1,614ක්, ජුලි මාසයේ 2,429ක්, අගෝස්තු මාසයේ 5,040ක්, සැප්තැම්බර්  මාසයේ 13,547ක්, ඔක්තෝම්බර් මාසයේ 22,771ක්, නොවැම්බර් මාසයේ 44,297ක් හා දෙසැම්බර් මාසයේ 89,506ක් ලෙස සංචාරකයින් පැමිනීම වර්ධනය වී තිබේ.

ඉකුත් 2021 වසරේ ජනවාරි මාසය තුල මෙරටට පැමිණ ඇත්තේ ‍සංචාරකයින් 1682ක් පමණක් යැයි පෙන්වා දෙන ඇමැතිවරයා සංචාරක ක්ෂේත්‍රය නගා සිටුවීම සඳහා දායකත්වය දක්වන සියලුදෙනා මෙම සාර්ථකත්වයේ කොටස්කරුවන් බවද සදහන් කළේය.

මෙරටට විදේශ විනිමය ලැබෙන ප්‍රධාන මාර්ගය වූ සංචාරක කර්මාන්තයේ බිද වැටිම හේතුවෙන් ඇතිව තිබෙන ආර්ථක අර්බුදය විසදීම සදහා ‍සංචාරක ක්ෂේත්‍රය පැවැති තත්ත්වයටත් වඩා හොද තත්ත්වයකට වර්ධනය කළ යුතු බවද සදහන් කරන අමාත්‍යවරයා ඒ සඳහා සෞඛ්‍ය මාර්ගෝපදේශ අනුව කටයුතු කිරිම හා නියමිත පරිදි එන්නත් මාත්‍රා ලබා ගැනිම සියලු ශ්‍රී ලාංකිකයින්ගේ යුතුකමක් බවද පවසයි.

Hits: 68