කෙන්යාවේ ශ්‍රී ලංකා මහ කොමසාරිස් කනනාදන් නයිරෝබි හි පිහිටි හෙළ ක්ලෝතින් නැරඹීමට යයි

කෙන්යාවේ ශ්‍රී ලංකා මහකොමසාරිස් වේලුපිල්ලේ කනනාදන් මහතා පසුගිය අගෝස්තු 31 වැනිදා එරට නයිරෝබි අගනුවර පිහිටි හෙළ ක්ලෝතින් ඇඟළුම් කර්මාන්ත ශාලාවේ නිරීක්ෂණයක නිරත වූ බව කෙන්යාවේ ශ්‍රී ලංකා මහ කොමසාරිස් කාර්යාලය පවසයි.

දූත මණ්ඩලයේ ආර්ථික රාජ්‍යතාන්ත්‍රික වැඩසටහනේ කොටසක් ලෙස, කෙන්යාවේ සිටින ශ්‍රී ලංකාවට විදේශ විනිමය ඉපැයීම් සඳහා දායක වෙමින් ආයෝජන මඟින් මුදල් උපයා දෙන ශ්‍රී ලාංකික ආයෝජකයින් සමඟ සම්බන්ධ වීම අරමුණු කරගනිමින් මහකොමසාරිස්වරයා මෙම සංචාරයේ නිරතව තිබේ. 

මෙම ස්ථානයේ දී මහ කොමසාරිස්වරයා සාදරයෙන් පිළිගත් හෙළ ක්ලෝතින් ඇඟළුම් සමාගමේ කළමනාකාර අධ්‍යක්ෂ දිලංක ජිනදාස මහතා, නිෂ්පාදන ඒකක වටා කැඳවාගෙන යමින් කෙන්යාවේ ඔවුන්ගේ ආයෝජනවල පැතිකඩ සහ ක්‍රියාකාරිත්වය පිළිබඳව එතුමාට විස්තර කළ බව පැවසෙයි.

අද වනවිට කෙන්යාවේ පිහිටි මෙම හෙළ ක්ලෝතින් ඇඟළුම් මඟින් වාර්ෂිකව ඩොලර් මිලියන 130 ක ආදායමක් ලංකාවට ලබා දෙයි. තම සමාගම මෝස්තර නිර්මාණයේ සිට බෙදා හැරීම දක්වා ගෝලීය වෙළඳ නාම සමඟ සමීපව කටයුතු කරන බවත්, හරිත මූලාරම්භයන්, නවෝත්පාදන ව්‍යාපාරික විසඳුම් සහ සදාචාරාත්මක හා තිරසාර සේවා පරිසරයන් හේතුවෙන් අප්‍රිකාවේ නමක් දිනාගෙන සිටින බව කළමනාකාර අධ්‍යක්‍ෂවරයා පවසා තිබේ.

මෙරටට විදේශ විනිමය ආදායමක් උත්පාදනය කරන බාහිර ආයෝජන සඳහා, ශ්‍රී ලංකාව විසින් ද සහයෝගය දැක්විය යුතු බව කළමනාකාර අධ්‍යක්‍ෂවරයා සඳහන් කර තිබේ. කෙන්යාවේ දී ක්‍රියාත්මක වෙමින් පවතින ව්‍යාපාරික කටයුතු පුළුල් වීමත් සමඟම නැවත ශ්‍රී ලංකාව වෙත එවනු ලබන ආදායම ද ඉහළ යන බව ඔහු පවසා ඇත.

තවද, කෙන්යාවේ සිටින ශ්‍රී ලාංකික ආයෝජකයින් සඳහා මහ කොමසාරිස් කනනාදන් මැතිතුමා දක්වන සහයෝගය සහ මඟ පෙන්වීම කළමනාකාර අධ්‍යක්‍ෂවරයා අගය කර තිබේ.

ශ්‍රී ලංකාවේ විදේශ විනිමය ඉපැයීම් සඳහා විදේශීය ආයෝජන විශාල වශයෙන් තිරසාර ලෙස දායක වන බව පිළිගත් මහ කොමසාරිස්වරයා, මේ පිළිබඳ සෑම අංශයකටම පහසුකම් සැලසීම සඳහා එතුමා ශ්‍රී ලංකාවේ සහ කෙන්යාවේ බලධාරීන් සමඟ කටයුතු කරන බවට පොරොන්දු වූ බවද මහකොමසාරිස් කාර්යාලය පවසයි.

හෙළ ක්ලෝතින් ඇඟළුම් සමාගම යනු ශ්‍රී ලාංකිකයෙකුට අයත්, ශ්‍රී ලංකාව, ඉතියෝපියාව, ඊජිප්තුව සහ කෙන්යාව පුරා පිහිටි කර්මාන්තශාලා සහිත තිරසාර ඇඟලුම් නිෂ්පාදන ආයතනයකි. 2016 සිට කෙන්යාවේ ඇඟලුම් නිෂ්පාදනයේ පුරෝගාමියෙකු වන හෙළ ක්ලෝතින් සමාගම, කෙන්යාවේ මුළු ඇඟලුම් අපනයනයෙන් 15% ක් හිමි කෙන්යාවේ විශාලතම යට ඇඳුම් නිෂ්පාදකයා දක්වා වේගයෙන් දියුණව කරා ගොස් තිබේ.

නයිරෝබි හි හෙළ ක්ලෝතින් ඇඟළුම් නිෂ්පාදන ඒකක දෙකක් පිහිටුවා ඇති අතර, ඉන් එකක් මඟින් යට ඇඳුම් සහ අනෙක මගින් පුද්ගලික ආරක්‍ෂක උපකරණ (PPE) හා මුහුණු ආවරණ නිෂ්පාදනය කරයි. තවද කෙන්යාවේ සිදුකළ හෙළ ආයෝජන මඟින් ශ්‍රී ලාංකිකයින් 64 දෙනෙකුට සහ කෙන්යාවේ වැසියන් 4,600 කට රැකියා ලබා දී ඇත. මීට අමතරව එම සමාගම මගින් කෙන්යාවේ රෙදි නිෂ්පාදන ඒකකයක් පිහිටුවීමේ ක්‍රියාවලියක ද යෙදී සිටින බවත් පවසයි.

Hits: 134