ලෝක බැංකුවේ ව්යාපෘතිවල අඛණ්ඩතාව පිළිබඳ ජනපතිට සහතිකයක්
ලෝක බැංකුවේ විධායක අධ්යක්ෂ පරමේෂ්වරන් අයියර් (Parameswaran Iyer) මහතා අද දිනයේ ජනාධිපති කාර්යාලයේදී ජනාධිපති අනුර කුමාර දිසානායක මහතා හමු වූ බව ජනාධිපති මාධ්ය අංශය පවසයි.
මෙහිදී ජනපති ප්රමුඛ නව රජයට සුබ පැතුම් එක් කළ ලෝක බැංකු විධායක අධ්යක්ෂවරයා, දැනට ලෝක බැංකුවේ සහාය ලබා දෙන සියලුම ව්යාපෘති ඉදිරියටත් එලෙසින්ම ක්රියාත්මක කරන බව ද සඳහන් කළේය. විශේෂයෙන්ම රජයේ Clean Sri Lanka වැඩසටහනට ලෝක බැංකු සහාය ලබා දෙන බවද ඔහු පවසා තිබේ.
ඒ අනුව රජයේ ඉදිරි සංවර්ධන සැලසුම් ක්රියාත්මක කිරීම සඳහා සහාය ලබා දෙමින් එහි ආරම්භක පියවර ලෙස මෙරට උපදේශන කණ්ඩායමක් සමඟ සාකච්ඡා පැවැත්වීමට සූදානම් බවද ලෝක බැංකු විධායක අධ්යක්ෂවරයා සඳහන් කර තිබේ.
එසේම නව රජයේ ඉදිරි සංවර්ධන සැලසුම් මෙන්ම, ග්රාමීය දුප්පත්කම පිටුදැකීම සඳහා වන සැලසුම්, ආර්ථික ඩිජිටල්කරණ වැඩසටහනට සමගාමීව ක්රියාත්මක ඩිජිටල් හැඳුනුම්පත් ව්යාපෘතිය ආදී ව්යාපෘති හා සැලසුම් පිළිබඳව ද ජනාධිපතිවරයා මෙහිදී දීර්ඝ ලෙස කරුණු සාකච්ඡා කර ඇත.
වතුකරයේ ජනතාවගේ ඉඩම් හා නිවාස ගැටලුව ඇතුළු උතුරු සහ නැගෙනහිර ජනතාව දීර්ඝ කාලයක් පුරා මුහුණ දී සිටින ගැටලුවලට විසඳුම් සෙවීම පිළිබඳව ද මෙහිදී දීර්ඝ ලෙස කතාබහට ලක් වී ඇත.
මෙරට කෘෂිකර්මාන්තය, ධීවර, සංචාරක, අධ්යාපන හා සෞඛ්ය යන ක්ෂේත්රයන් සංවර්ධනය කිරීම කෙරෙහි රජයේ ප්රමුඛ අවධානය යොමුව තිබෙන බව ජනාධිපති අනුර කුමාර දිසානායක මහතා ලෝක බැංකු විධායක අධ්යක්ෂවරයා වෙත පවසා තිබේ.
කම්කරු අමාත්ය සහ ආර්ථික සංවර්ධන නියෝජ්ය අමාත්ය මහාචාර්ය අනිල් ජයන්ත, මුදල් හා ක්රම සම්පාදන නියෝජ්ය අමාත්ය ආචාර්ය හර්ෂණ සුරියප්පෙරුම, ජනාධිපති ලේකම් ආචාර්ය නන්දික සනත් කුමානායක යන මහත්වරු ද මෙම සාකච්ඡාවට එක්ව සිට ඇත.
