ලෝකයේ හොඳම හෝටල් 50 අතරට ලංකාවේ එකම එක හෝටලයකුත්

ලොව හොඳම හෝටල් 50 වර්ගීකරණය කෙරෙන The World’s 50 Best Hotels 2024 ලැයිස්තුවෙහි 39 වැනි ස්ථානයට පත්වීමට ශ්‍රී ලංකාවේ ගාල්ලේ පිහිටි Amangalla හෝටලය සමත්ව ඇතැයි වාර්තා වෙයි.

2024 වසර සඳහා වන මෙම  The World’s 50 Best Hotels ලැයිස්තුව ප්‍රකාශයට පත් කිරීම පෙරේදා ලන්ඩන් නුවරදී සිදු විය.

යුනෙස්කෝ ලෝක උරුමයක්ද වන ගාලු කොටුවේ පිහිටි මෙම Amangalla හෝටලය AMAN හෝටල් සමූහයට අයත් තරුපන්තියේ සුඛොපභෝගී සංචාරක හෝටලයකි. එම සමාගමට අනුව ඔවුන් පවත්වාගෙන යන හෝටල් 15ත්ම යුනෙස්කෝ ලෝක උරුම පරිශ්‍ර වෙත ආසන්නයේ පිහිටා තිබේ.

මෙම The World’s 50 Best Hotels 2024 ලැයිස්තුවෙහි පළමු ස්ථානය තායිලන්තයේ බැංකොක් නුවර පිහිටි Capella Bangkok හෝටලය දිනා ගෙන තිබේ. එසේම ඉතාලියේ Moltrasio හි පිහිටි Passalacqua හෝටලය දෙවැනි ස්ථානයටත්, හොංකොංහි Rosewood හෝටලය තෙවැනි ස්ථානයටත්පත්ව තිබේ.

ශ්‍රී ලංකාවේ Amangalla හෝටලය අයත් AMAN හෝටල් සමූහය යටතේ ජපානයේ ක්‍රියාත්මක Aman Tokyo හෝටලය 7 වැනි ස්ථානයටත්, එක්සත් ජනපදයේ නිව්යෝර්ක්හි පිහිටි Aman New York හෝටලය 37 වැනි ස්ථානයටත් පත්ව තිබේ.

Views: 273