බීජිං නුවරදී පළමුවරට ලංකාවේ තේ වෙළඳසැලක් සහ සංස්කෘතික මධ්‍යස්ථානයක් විවෘත කෙරේ
බීජිං හි ශ්‍රී ලංකා තානාපති කාර්යාලය, චීනයේ ශ්‍රී ලංකා වෙළෙඳ හා ආර්ථික සහයෝගීතා සංගමය (CSLATE) සහ සීමාසහිත බීජිං වන්හොංග්තායි ටෙක්නොලොජි සමූහ සමාගම සමඟ එක්ව, එරට චාඕයැංග් දිස්ත්‍රික්කයේ සුප්‍රකට ෂීයු ෂුයි වීදියේ දී ශ්‍රී ලංකාවේ ප්‍රථම තේ වෙළඳසැල සහ සංස්කෘතික මධ්‍යස්ථානය පසුගියදා විවෘත කළ බව පවසයි.
විශාල එළිමහන් ප්‍රදේශයක් සහිත මෙම වෙළඳසැල තානාපතිවරයා වෙත නොමිලේ පිරිනමා ඇත. මෙම මුලපිරීම, දෙරට අතර රාජ්‍යතාන්ත්‍රික සබඳතා පිහිටුවා වසර 65 ක් සපිරීමේ සංවත්සරය සහ රබර්- සහල් ගිවිසුමේ 70 වැනි සංවත්සරය නිමිත්තෙන් තානාපති කාර්යාලය ක්‍රියාත්මක කරන ක්‍රියාකාරකම් මාලාවට ඇතුළත් එක් මුලපිරීමකි.
ෂැංහයි සහයෝගීතා සංවිධානයේ (SCO) නියෝජ්‍ය මහලේකම්වරයා, රාජ්‍ය නිලධාරීන්, බීජිං හි රාජ්‍යතාන්ත්‍රික දූත මණ්ඩල නියෝජිතයන් සහ චීන ව්‍යාපාරික ප්‍රජාව මෙම අවස්ථාවට සහභාගී වී තිබේ.
පැමිණ සිටි පිරිස ඇමතූ බීජිං හි ශ්‍රී ලංකා තානාපති ආචාර්ය පාලිත කොහොන මැතිතුමා, මෙම මුලපිරීම චීනය තුළ ලංකා තේ ප්‍රවර්ධනය කිරීම සඳහා වූ පුරෝගාමී මුලපිරීමක් බව සඳහන් කර ඇති අතර, CSLATE හි සහ සීමාසහිත බීජිං වන්හොංග්තායි ටෙක්නොලොජි සමූහ සමාගමේ උද්‍යෝගීමත් දැක්ම වෙනුවෙන් සිය ස්තුතිය පුද කර තිබේ.
මෙය චීනයේ ප්‍රථම ලංකා තේ වෙළඳසැල සහ සංස්කෘතික මධ්‍යස්ථානය වන අතර තවත් බොහෝ තේ වෙළඳසැල් චීනය තුළ විවෘත වනු ඇතැයි තමන් අපේක්ෂා කරන බව, තානාපතිවරයා සඳහන් කර ඇත. ලංකා තේ රසවිඳීම සඳහා තම හිතවතුන් ද කැටුව මෙම තේ වෙළඳසැලට පැමිණෙන ලෙස පැමිණ සිටි පිරිසට තානාපතිවරයා ආරාධනා කර තිබේ.
ලංකා තේ සතු සුවිශේෂී රස සහ සුවඳ හේතුවෙන් එය ලොව ප්‍රමුඛ පෙළේ කළු තේ අතර ප්‍රමුඛයා බවට පත්ව ඇත. දෙවැනි ලේකම් (තේ ප්‍රවර්ධන) සම්පත් පෙරේරා මහතා ලංකා තේ සකස් කරන අයුරු ප්‍රදර්ශනය කර ඇත. එසේම ලංකා තේ නිෂ්පාදනය කරන ශ්‍රී ලංකාවේ කලාප හත සහ ඒවායේ සුවිශේෂී රස සහ සුවඳ පිළිබඳව ද විස්තර කර තිබේ.
Visits: 78
