ශ්‍රී ලංකාව හා නෙදර්ලන්තය අතර ද්විපාර්ශවික ගුවන් සේවා ගිවිසුමක් සඳහා සැලසුම්
ශ්‍රී ලංකාව හා නෙදර්ලන්තය අතර ද්විපාර්ශවික ගුවන් සේවා ගිවිසුමකට අත්සන් තැබීමට සූදානමින් සිටින බව සංචාරක අමාත්‍යාංශය පවසයි. දෙරට අතර සෘජු ගුවන් මගී හා භාණ්ඩ ගුවන් ගමන් ආරම්භ කිරිම මෙහි අරමුණයි.
මෙමගින් ශ්‍රී ලංකාව හා නෙදර්ලන්තය අතර සංචාරක, අධ්‍යාපන, වෙළද, ආයෝජන, කෘෂිකාර්මික හා සංස්කෘතික සබදතා තවදුරටත් වර්ධනය වෙනු ඇතැයි සංචාරක ඇමති ප්‍රසන්න රණතුංග මහතා සඳහන් කර සිටියි.
මෙම ගුවන් සේවා ගිවිසුම අත්සන් කිරිම සදහා අමාත්‍යවරයා විසින් කැබිනට් මණ්ඩලය වෙත ඉදිරිපත් කළ යෝජනාව වෙතද ඊයේ දිනයේ අනුමැතිය හිමිවිය.
ජනාධිපති ගෝඨාභය රාජපක්ෂ මහතාගේ සෞභාග්‍ය යේ දැක්ම ප්‍රතිපත්ති ප්‍රකාශයට අනුව ආර්ථික සංවර්ධනය ඉලක්ක කර ගනිමින් මෙම ගිවිසුමට අත්සන් කිරිමට සැලසුම් කර තිබේ.
වර්ෂ 1944 දි අත්සන් කරනු ලද චිකාගෝ සම්මුතියට අනුව රාජ්‍යයක් දෙකක් හෝ කිපයක් අතර ජාත්‍යන්තර වාණිජ ගුවන් ගමන් සේවා පවත්වාගෙන යාම සදහා ගුවන්සවො ගිවිසුම්වලට එළඹීම අනිවාර්යය වේ.
මේ වන විට ජාත්‍යන්තර සිවිල් ගුවන්සේවා සංවිධානයේ ලියාපදිංචි රාජ්‍යයන් ගණන 193 කි. එම රාජ්‍යයන් සමග ගිවිසුම්වලට එළඹීමෙන් අවශ්‍ය අවස්ථාවල ගුවන් සේවා කටයුතු වල නියැලීමට හැකිවන බව ඇමතිවරයා පෙන්වා දෙයි.
ශ්‍රී ලංකාව හා නෙදර්ලන්තය අතර තානාපති සබදතා ආරම්භ වි ඇත්තේ 1951 වසරේ සිටයි. සතියකට ශ්‍රී ලංකාව හා නෙදර්ලත්නය අතර ගුවන් ගමන් වාර 14 ක් ක්‍රියාත්මක කිරිමට මේ සම්බන්ධයෙන් පැවති මූලික සාකච්ඡාවල දි තීරණය කර තිබේ.
ශ්‍රී ලංකන් ගුවන් සමාගම හා නෙදර්ලන්තයේ KLM Royal Dutch ගුවන් සේවාව මේ සදහා යොදවා ගැනීමට ද සැලසුම් කර ඇතැයි ඇමති ප්‍රසන්න රණතුංග මහතා වැඩිදුරටත් සදහන් කරයි.
Visits: 75
