පිට පිට 11 වන වරටත් ලෝකයේ හොඳම බැංකු 1000 අතරට කොමර්ෂල් බැංකුව තේරී පත්වෙයි

එංගලන්තයේ සුප‍්‍රකට ‘ද බෑන්කර්’ සඟරාව විසින් වාර්ෂිකව එළිදක්වන ‘ලෝකයේ හොඳම බැංකු 1000’ ලයිස්තුවට 2021 වසරේදී පිට පිටම 11 වතාවටත් තේරී පත්වූ එකම ශ‍්‍රී ලාංකේය බැංකුව බවට පත්වෙමින් කොමර්ෂල් බැංකුව නැවත වතාවක් ගෝලීය බැංකු ක්ෂේත‍්‍රයේ දැවැන්තයින් අතරට පැමිණ තිබේ. 

ගෝලීය වශයෙන් ඉමහත් කීර්තියක් දිනාගෙන තිබෙන මෙම වර්ගීකරණය 51 වන වසර සඳහා ප‍්‍රකාශනයට පත්කර තිබෙන අතර එහි වැඩිම කාලයක් අඛණ්ඩව රැඳී සිටි දේශීය බැංකුව කොමර්ෂල් බැංකුවයි. වර්තමාන කොවිඞ්-19 වසංගත තත්ත්වය තුළදී පවා බැංකුවේ ස්ථාවරත්වය මෙන්ම අධිෂ්ඨානය සහ මූල්‍ය ශක්තිය ඉහළ බව පෙන්වයි. 

එංගලන්තයේ ෆයිනෑන්ෂල් ටයිම්ස් විසින් ප‍්‍රකාශනයට පත්කරන ‘ද බෑන්කර්’ සඟරාව විසින් මූලික වශයෙන් පළමු පෙළ ප‍්‍රාග්ධනය පදනම් කරගනිමින් බැංකු වර්ගීකරණය කරයි.

‘කොමර්ෂල් බැංකුවේ ශක්තිය සහ වෘත්තීයභාවය මෙන්ම කොවිඞ්-19 වසංගත තත්ත්වය වෙනුවෙන් බැංකුව සිදුකළ කැප කිරීම් මෙම වර්ගීකරණය මගින් සත්‍යවශයෙන්ම සහතික කරනවා.’ යනුවෙන් මෙම ජයග‍්‍රහණය පිළිබඳව අදහස් දක්වමින් කොමර්ෂල් බැංකුවේ කළමනාකාර අධ්‍යක්ෂ, එස්. රෙන්ගනාදන් මහතා පැවසීය.

‘ලෝකයේ හොඳම බැංකු 1000 වර්ගීකරණයට ඇතුළත් වූ ශ‍්‍රී ලංකාවේ පළමු බැංකුව බවට පත්වීම සංධිස්ථානාත්මක ජයග‍්‍රහණයක්. එසේම, විවිධ කාල වලදී දේශීයව සහ ගෝලීයව පැවති අභියෝග හමුවේ වුවද පිට පිටම 11 වසරක් මෙම වර්ගීකරණයට අඛණ්ඩවම තේරී පත්වීම කැපී පෙනෙන ජයග‍්‍රහණයක් වන අතර එය ගෝලීය වශයෙන් බැලූවද සුවිශාල කරුණක් බව සඳහන් කළ හැකියි. මෙය ඇප කැපවීමෙන් වැඩකරන සමස්ත කොමර්ෂල් බැංකු කණ්ඩායමටම ලැබුණු උපහාරයක්. එසේම, අපගේ උපරිම ශක්තියෙන් සියළුම පාර්ශවකරුවන්ට සේවා ලබාදීම සඳහා මෙය අමතර දිරි බලයක් ලබාදෙනවා.’   යනුවෙන්ද ඒ මහතා වැඩිදුරටත් පවසා තිබේ.

මෙම වර්ගීකරණයේදී ‘ද බෑන්කර්’ සඟරාව විසින් මූලික වශයෙන් පළමු පෙළ ප‍්‍රාග්ධනය පදනම් කරගනිමින් අංක 1 සිට 1000 දක්වා බැංකු වර්ගීකරණය කරන අතර ලොව බැංකු කර්මාන්තයේ වඩාත්ම ඇගයීමට ලක්වී තිබෙන වර්ගීකරණයක් වන ලෝකයේ ප‍්‍රමුඛතම බැංකු 1000 වර්ගීකරණයේ කළාපීය ලයිස්තුව සකස් කිරීමේදී සඟරාවේ කර්තෘ මණ්ඩලයේ අදහස්ද සැලකිල්ලට ගනී. අංශ අටක කාර්ය සාධනය මනිමින් රටින් රටට බැංකු වලට ලකුණු ලබාදීමටත් ඒවා වර්ගීකරණය කිරීමටත් ප‍්‍රධාන අනුපාත 30 ක් ඇතුළත් ආකෘතියක් මෙහිදී භාවිතා කරයි. වර්ධනය, මෙහෙයුම් කාර්යක්ෂමතාවය, අවධානමට අදාළ ප‍්‍රතිලාභය, විශ්වාසවන්තභාවය, ලාභදායීතාවය, වත්කම්වල ගුණාත්මක භාවය, ද්‍රවශීලතාවය මෙහිදී සැලකිල්ලට ගනී.

2021 වසරේදී ශ‍්‍රී ලංකාවේ ශක්තිමත්ම බැංකු සන්නාමය ලෙසින් බ‍්‍රෑන්ඞ් ෆයිනෑන්ස් විසින් කොමර්ෂල් බැංකුව තෝරාගත් අතර 2020 වසර අවසන් වනවිට බැංකුව සතුව රුපියල් ටි‍්‍රලියන 1.763 ක සමස්ත වත්කම් පැවතුණි. එසේම, 2020 මූල්‍ය වසරේදී බැංකුව රුපියල් බිලියන 151.966 ක දළ ආදායමක්, රුපියල් බිලියන 16.373 ක ශුද්ධ ලාභයක්, රුපියල් ටි‍්‍රලියන 1.287 ක තැන්පතු පදනමක් සහ රුපියල් බිලියන 961.859 ක ණය පොතක් වාර්තා කරන ලදී. 

Visits: 70