කොරියාවේ රැකියා සඳහා පිටත්වීමට ඉක්මනින්ම අවස්ථාව ලබා දෙන බවට තානාපතිගෙන් සහතිකයක්
කොරියාවේ රැකියා සඳහා සුදුසුකම් ලබා ඇති ශ්‍රී ලංකා තරුණ තරුණියන් සඳහා එරටට යෑමට අවශ්‍ය පහසුකම් ඉක්මනින් සපයන බව ශ්‍රී ලංකාවේ කොරියානු තානාපති වොන්ජින් ජියෝන් මහතා (Woonjin Jeong) විදේශ අමාත්‍යවරයාට සහතික වී ඇතැයි එම අමාත්‍යාංශය පවසයි.
කොරියාවේ රැකියා සඳහා සුදුසුකම් ලබා ඇති තරුණ පිරිස මුහුණ දී ඇති ප්‍රමාදය පිළිබඳ සාකච්ඡා කිරිම සඳහා විදේශ අමාත්‍ය දිනේෂ් ගුණවර්ධන මහතාගේ ප්‍රධානත්වයෙන් 2021 ජූනි 16 වන දින විදේශ අමාත්‍යංශයේ පැවැති සාකච්ඡාවකදී තානාපතිවරයා මේ බව සඳහන් කර ඇත.
මෙහිදී විදේශ අමාත්‍යවරයා පෙන්වා දී ඇත්තේ කොරියාවේ රැකියා සඳහා සුදුසුකම් ලබා ඇති පිරිස දීර්ඝ කාලයක් තිස්සේ එහි රැකියා සඳහා පිටත්ව යාමට අපේක්ෂාවෙන් සිටින නමුත්, කොවිඩ් වසංගත තත්ත්වය නිසා එය දිනෙන් දින මඟ හැරි ගොස් ඇති බවයි. මේ නිසා ඔවුන් දැඩි මානසික පීඩනයකට ලක්ව සිටින බව ද අමාත්‍යවරයා වැඩිදුරටත් සඳහන් කර ඇත.
මෙහිදී කොරියානු රජයේ ස්ථාවරය පැහැදිලි කළ ශ්‍රී ලංකාවේ කොරියානු තානාපතිවරයා, කොරියානු රැකියා සඳහා සුදුසුකම් ලබා ඇති සියලු දෙනාටම එම රැකියා අවස්ථා සලසා දීමට සැලසුම් කර ඇති බව පවසා ඇත. කොවිඩ් වසංගත තත්වය නිසා එම අවස්ථා ලබා දීමේ යම් ප්‍රමාදයක් ඇති නමුත් හැකි පළමු අවස්ථාවේම ඔවුන්ව කොරියාවට පිටත් කිරීමට තමන් අවධානයෙන් සිටින බව ද ඔහු සඳහන් කර තිබේ.
එමෙන්ම ශ්‍රී ලංකාවේ කෘෂිකාර්මික ක්ෂේත්‍රයේ දියුණුව සඳහා ද කොරියානු රජය ආධාර උපකාර කිරීමට අපේක්ෂාවෙන් අදාළ කටයුතු සැලසුම් කරමින් සිටින බව ද තානාපතිවරයා මෙහිදී සඳහන් කර ඇත. තවද කොරියාවේ රැකියා සඳහා ශ්‍රී ලාංකික තරුණ පිරිසට වැඩි අවස්ථා ලබා ගැනීම, දෙරටේ ආර්ථික සහයෝගිතාව වර්ධනය කර ගැනීම ඇතුළු කරුණු කීපයක්ම මෙම සාකච්ඡාවට බඳුන් වී තිබේ.
විදේශ රැකියා රාජ්‍ය අමාත්‍ය ප්‍රියංකර ජයරත්න, එම අමාත්‍යංශයේ ලේකම් සුන්දරම් ආරුමේනිහාම්, විදේශ රැකියා කාර්යංශයේ සභාපති කමල් රත්වත්ත, එහි උප සභාපති නිමල් තිබ්බටුමුණුව හා විදේශ රැකියා කාර්යාංශයේ සාමාන්‍යාධිකාරි මංගල රන්දෙනිය ඇතුළු පිරිසක් මෙම සාකච්ඡාවට සහභාගි වී තිබේ.
Visits: 70
