08 වැනිදා තහනමට පෙර සහ පසු UK යන ශ්‍රී ලංකන් මගීන් වෙත විශේෂ නිවේදනයක්
2021 ජුනි මස 8 වන අඟහරුවාදා පැය 0400 (එක්සත් රාජධානියේ වේලාව) සිට බලපැවැත්වෙන පරිදි ශ්‍රී ලංකාව එක්සත් රාජධානියට ඇතුළු වන රටවලට අදාල “රතු ලැයිස්තුවට” ඇතුලත් කිරීමට එරට බලධාරීන් තීරණය කර තිබෙන බව නිවේදනයක් මගින් දැනුම් දී ඇතැයි ශ්‍රී ලංකන් ගුවන් සේවය පවසයි.
ඒ අනුව එදින සිට නැවත දැනුම් දෙන තුරු ශ්‍රී ලංකන් මගී ගුවන් යානයක් එක්සත් රාජධානිය වෙත පියාසර නොකරන බව ගුවන් සේවය සිය ගනුදෙනුකරුවන්ට දැනුම් දී සිටියි.
කෙසේ වෙතත් සිය ගුවන් සමාගම හරහා ජුනි 05, 06, 07 යන දිනවල ලන්ඩන් සිට ක්‍රියාත්මක වන ගුවන් ගමන් වාර තුන (UL 503) සඳහා දැනටමත් ගුවන් ගමන් වෙන්කරවා ඇති මගීන්ට මෙය බලනොපාන බවත් සමාගම පවසයි.
මෙම තහනමට අනුව ජුනි මස 08 සිට ශ්‍රී ලාංකිකයින්ට එක්සත් රාජධානියට යාමට අවසර නොලැබුණත්, බ්‍රිතාන්‍ය පුරවැසියන්/අයර්ලන්ත පුරවැසියන් හෝ එක්සත් රාජධානියේ පදිංචිය සඳහා පුරවැසි හිමිකම් ඇති අයට පමණක් අවසර හිමිවන බවත් සඳහන් වෙයි.
එහිදී මෙලෙස ගමන් කිරීමට අවසර හිමි වන මගීන් අනිවාර්යයෙන්ම;
ඔවුන්ගේ ගමනට දින තුනකට පෙර (පැය 72) COVID-19 පරීක්‍ෂණයක් කර එහි negative ප්‍රතිඵලයක් ලබා ගත යුතුය.
පැමිණීමට පෙර දින 14 ක කාලයක් තුළ නිරෝධායන සඳහා හෝටලයක් වෙන්කරවා ගත යුතුය. අදාල වෙන්කිරීම් සඳහා හෝටල්, නිරෝධායන ප්‍රවාහනය සහ නිරෝධායනයේ 2 වන සහ 8 වන දින වල සිදුකරන COVID-19 පරීක්ෂණ ඇතුළත් වේ.
මගීන් පැමිණෙන විට නිරෝධායනය කරන්නේ කොතැනද යන්න පිළිබඳ විස්තර සහිතව මගී පෝරමයක් (PLF) සම්පූර්ණ කළ යුතුය. මගීන් තම මගී ස්ථානගත කිරීමේ පෝරමය සම්පූර්ණ කිරීම සඳහා නිරෝධායන පැකේජ ඉන්වොයිස් අංකයක් ලබා දිය යුතුය.
මගීන් ඔවුන්ගේ නිරෝධායන හෝටලය සහ දින 2 සහ 8 දින සිදුකරන පරීක්ෂණ මෙමගින් වෙන්කරවා ගත යුතුය.
https://www.gov.uk/guidance/booking-and-staying-in-a-quarantine-hotel-when-you-arrive-in-england
මගී ස්ථානගත කිරීමේ පෝරමය මෙමගින් ලබා ගත හැකිය.https://www.gov.uk/provide-journey-contact-details-before-travel-uk
වැඩි විස්තර සහ පැහැදිලි කිරීම් සඳහා මගීන්ට ඔවුන්ගේ සංචාරක නියෝජිතයන්, ඔවුන්ගේ ළඟම ඇති ශ්‍රීලංකන් ගුවන් සේවා කාර්යාලය හෝ +94117771979 අංකයෙන් ගුවන් සමාගමේ ගෝලීය සම්බන්ධතා මධ්‍යස්ථානය ඇමතීමෙන් ලබා ගත හැකි බවත්, එසේ නැත්නම් www.srilankan.com හරහා ශ්‍රී ලංකන් වෙබ් අඩවිය වෙත පිවිස තොරතුරු ලබා ගත හැකි බවත් ගුවන් සමාගම පවසයි.
Visits: 109
