ඇමති විමල් බිව් මේඩ් ඉන් ශ්‍රී ලංකා ‘නෙල්ලි කෝලා’ ශක්ති ජනක පානය
පානදුර පිහිටි ‘maa products’ පුද්ගලික සමාගම විසින් දේශීය නිෂ්පාදනයක් ඉදිරිපත් කරන ‘නෙල්ලි කෝලා’ ශක්ති ජනක පානය ජන ගත කිරීමේ උත්සවය කර්මාන්ත අමාත්‍ය විමල් වීරවංශ මහතා අතින් අද සිදු වුණු බව එම අමාත්‍යාංශය පවසයි.
දේශීය ව්‍යවසායකයෙකු වන මුදිත සමනක්කොඩි මහතා විසින් මෙම නිෂ්පාදනය ඉදිරිපත් කර තිබේ. ‘maa products’ පුද්ගලික සමාගම සඳහන් කරන ආකාරයට මෙම නෙල්ලි කෝලා පානය ස්වාභාවික අමුද්‍රව්‍ය යොදා නිෂ්පාදනය කෙරුණකි. එසේම එය ශක්තිජනක පානයක් වන බවත් පවසයි.
මෙම අවස්ථාවට සහභාගි වෙමින් අදහස් දක්වා ඇති කර්මාන්ත අමාත්‍ය විමල් වීරවංශ මහතා, “දැනට වෙළෙඳ පොළේ තිබෙන සියලුම කෘත්‍රිම ශක්තිජනක පානවලට වඩා මෙය ශක්තියෙන් අනූනයි. අපේ ජීවන රටාවේ ඇති වෙමින් තිබෙන අවුලට උත්තර සොයන මෙවැනි නිෂ්පාදකයන් තමයි අද අපට ඕනේ. එහෙම නැතිව වැල යන අතට මැස්ස ගහන අය නොවෙයි.” යනුවෙන් පවසා ඇත.
ඒ ආදර්ශය සෙසු ව්‍යවසායකයන්ට හා නිෂ්පාදකයන්ට ඉතාම ඉහළින් අගය කළ හැකි ආදර්ශයක් බවද අමාත්‍යවරයා මෙහිදී සඳහන් කර තිබේ.
“දැනට මාස ගණනාවකට කලින් මෙතුමා නිෂ්පාදනයේ සාම්පල අරගෙන අපේ අමාත්‍යාංශයට පැමිණියාම ඒ වෙනුවෙන් ලබා දිය හැකි සෑම සහයෝගයක්ම ලබා දීමට අප එකඟ වුණා. එතුමන් සමග හවුල්කාරීත්වයකට පිරිසක් එක්ව තිබෙනවා. ඒ පිරිස සමග එක්ව කෙටි කලකින් මේ නෙල්ලි කෝලා පාලය ජන ගත කිරීමට හැකිව තිබීම ඉමහත් සතුටට කාරණාවක්.” යනුවෙන්ද අමාත්‍යවරයා පවසා ඇත.
මෙම අවස්ථාව සඳහා රාජ්‍ය අමාත්‍ය ජයන්ත සමරවීර මහතා ද විශේෂ ආරාධිතයෙකු ලෙස සහභාගි වී තිබේ. එසේම ‘maa products’ පුද්ගලික සමාගම වෙනුවෙන් එහි අධ්‍යක්ෂ මුදිත සමනක්කොඩි සහ එහි අධ්‍යක්ෂ මණ්ඩල සාමාජිකයන් වන චින්තන ජයසිංහ, පියුමි සමනක්කොඩි, මන්ද්‍රී සමනක්කොඩි ඇතුළු පිරිසක්ද සහභාගි වී සිට තිබේ.
Visits: 102
