ව්‍යාජ රැකියා ඒජන්සි පිළිබඳ රුසියාවේ ශ්‍රී ලංකා තානාපති කාර්යාලයෙන් නිවේදනයක්

ව්‍යාජ තොරතුරු මත රුසියාවේ අධ්‍යාපන හා රැකියා සඳහා යවන ශ්‍රී ලාංකිකයින් එරටදී නීතියේ රැහැනට අසුවන බැවින් හොර රැකියා ඒජන්සි ආයතනවලට නොරැවටෙන ලෙස රුසියාවේ ශ්‍රී ලංකා තානාපති කාර්යාලය ශ්‍රී ලාංකිකයින්ගෙන් ඉල්ලා සිටියි.

ව්‍යාජ විදේශ රැකියා සහ අධ්‍යාපනික නියෝජිතායතනවලට එරෙහිව ශ්‍රී ලාංකිකයන්ගෙන් රුසියාවේ තානාපති කාර්යාලයට ලැබෙන පැමිණිලි සංඛ්‍යාව ඉහළ ගොස් ඇති බවද තානාපති කාර්යාලය පෙන්වා දෙයි.

එහිදී රැකියා අවස්ථා ලබා ගැනීමේ සහ තවදුරටත් යුරෝපා රටවල් කරා සංක්‍රමණය වීමේ අපේක්ෂාවෙන් යුතුව, ශිෂ්‍ය/සංචාරක වීසා මඟින් රුසියානු සමූහාණ්ඩුව වෙත පැමිණෙන ශ්‍රී ලාංකිකයන්ගේ සංඛ්‍යාව වසරින් වසර විශාල වශයෙන් ඉහළ ගොස් ඇති බව නිරීක්ෂණය වී ඇතැයි තානාපති කාර්යාලය පවසයි.

“මෙම වසරේ දී, රුසියානු බලධාරීන් විසින් ශ්‍රී ලාංකිකයන් 27 දෙනෙකු අත්අඩංගුවට ගන්නා ලද අතර, ඉන් 17 දෙනෙකු දැනටමත් තම සිර දඬුවම් අවසන් කිරීමෙන් අනතුරුව ආපසු ශ්‍රී ලංකාවට ගොස් තිබේ. අනෙක් පුද්ගලයන් දස දෙනෙකු පිළිබඳ නීතිමය කටයුතු සිදු කෙරෙමින් පවතින බැවින්, රුසියානු සමූහාණ්ඩුවේ විවිධ නගරවල රැඳවුම් මධ්‍යස්ථානවල තවදුරටත් රඳවා සිටිති.” කාර්යාලයේ නිවේදනයේ සඳහන් වෙයි.

ශ්‍රී ලංකාවේ විදේශ රැකියා සහ අධ්‍යාපනික නියෝජිතායතන කිහිපයක්, රුසියාවේ වෙසෙන විදේශික ශ්‍රී ලාංකිකයන් සහ තවත් සංවිධානය වූ කණ්ඩායම් මෙම නීතිවිරෝධී කටයුතුවල නිරත වන බව අනාවරණය වී තිබේ.

බොහෝ විට, ඉහළ වැටුප් සහිත රැකියා ලබාගැනීම සහ දේශසීමා හරහා යුරෝපා රටවලට ඇතුළුවීම සඳහා පහසුකම් සැලසීමේ ව්‍යාජ පොරොන්දු මඟින් නොමඟ යවනු ලැබූ ශිෂ්‍ය ශිෂ්‍යාවන් ශිෂ්‍ය/සංචාරක වීසා මඟින් එරටට යවනු ලැබේ.

තවද, රුසියාව කරා ගමන් කිරීම සඳහා මෙම ශිෂ්‍ය ශිෂ්‍යාවන්ගෙන් සැලකිය යුතු තරම් විශාල මුදල් ප්‍රමාණ මෙම නියෝජිතවරුන් විසින් අයකරනු ලබන බව සඳහන් වී ඇත. ඉන්පසු, ඔවුන් නීතිවිරෝධී ලෙස බෙලරුස්, යුක්‍රේනය වැනි රටවලට සහ තවදුරටත් යුරෝපය තුළට මිනිස් ජාවාරමක් ලෙස යැවීම සඳහා උත්සාහ දරනු ලැබේ.

බොහෝ ශ්‍රී ලාංකික සිසු සිසුවියන්, සැකයකින් තොරව පැමිණෙන සිසුන් සූරාකෑම සහ නිසි නීතිමය මාර්ග නොසලකා මුදල් ලබා ගැනීම අරමුණු කොට ගත් වංචනික නියෝජිතයන්ගේ උපායවලට ගොදුරු වෙමින් පවතී. රුසියාවට හෝ වෙනත් අසල්වැසි රටකට ළඟා වීම සඳහා එවැනි නීතිවිරෝධී මාර්ග භාවිතා කිරීමෙන් වළකින ලෙස රුසියානු සමූහාණ්ඩුවේ ශ්‍රී ලංකා තානාපති කාර්යාලය ශ්‍රී ලාංකිකයන්ට තරයේ අවවාද කරයි.

සංක්‍රමණ නීති රීතිවලට අනුව, සංචාරක වීසා මඟින් රුසියානු සමූහාණ්ඩුව වෙත පැමිණෙන විදේශකයන් හට ඔවුන්ගේ වලංගු වීසා කාලසීමාව තුළ දී රැකියාවල නිරත වීමට අවසර දෙනු නොලබන අතර, දඬුවමකට ද යටත් වීමට සිදු වේ.

සංක්‍රමණික සේවකයින් ලෙස නීතිවිරෝධී අන්දමින් රැඳී සිටීම, වීසා බලපත්‍ර කල් ඉකුත්වීම සහ සංක්‍රමණ නීති උල්ලංඝනය කිරීම, ව්‍යාජ ශිෂ්‍ය/රැකියා වීසා බලපත්‍ර ලබා ගැනීම, නීතිවිරෝධී ලෙස රාජ්‍ය දේශසීමා තරණය කිරීම ඇතුළු නීතිවිරෝධී ක්‍රියාවන් සම්බන්ධයෙන් ශ්‍රී ලාංකිකයින් ගණනාවකට සිර දඬුවම් හා දඩ නියම කර ඇති බව රුසියානු නීතිය බලාත්මක කිරීමේ බලධාරීන් විසින් මෙම තානාපති කාර්යාලය වෙත දැනුම් දී ඇත.

සුදුසු ක්‍රියාමාර්ග ගැනීම පිණිස, මිනිස් ජාවාරම් පිළිබඳ වාර්තා වූ පැමිණිලි පිලිබඳ විස්තර සම්බන්ධයෙන් රුසියානු සමූහාණ්ඩුවේ මෙන්ම ශ්‍රී ලංකාවේ ද රජයන්හි අදාළ බලධාරීන් දැනුවත් කිරීම සඳහා රුසියානු සමූහාණ්ඩුවේ ශ්‍රී ලංකා තානාපති කාර්යාලය මූලික පියවර ගෙන ඇතැයිද පවසයි.

එබැවින් එවැනි ව්‍යාජ ආයතන පිළිබඳව සුපරීක්ෂාකාරී වන ලෙසත්, කිසිදු නීති විරෝධී ආයතනයකට ගෙවීම් කිරීමෙන් වැළකී සිටින ලෙසත්, මිනිස් ජාවාරමට ගොදුරු නොවී සිටින ලෙසත් තරයේ අවවාද කරනු ලැබේ. තවද, රැකියා අවස්ථා සෙවීමේ හෝ දේශසීමා හරහා යුරෝපයට ඇතුළු වීමේ අපේක්ෂාවෙන් ශිෂ්‍ය/සංචාරක වීසා මත රුසියානු සමූහාණ්ඩුව වෙත යාමෙන් වළකින ලෙසට උපදෙස් දෙනු ලැබේ.

Visits: 66