ප්‍රධාන වතු සමාගම් 20න් 10ක් අක්‍රීයයිලු?

මෙරට ප්‍රධාන තේ වතු සමාගම් 20න් 10ක් අක්‍රිය තත්ත්වයට පත්ව ඇතැයි වාර්තා වෙයි. විශේෂයෙන්ම කුඩා තේ වතු ඉහළ නිෂ්පාදනයක් අත්කර ගන්නා විට වතු සමාගම්වල නිෂ්පාදන ධාරිතාව සීග්‍රයෙන් පහත වැටී ඇතැයි ක්ෂේත්‍රයේ ප්‍රවීණයන් පසුගියදා ජනපතිවරයා ඉදිරියේ අනාවරණය කර තිබේ.

සමාගම් වතු ප්‍රතිසංස්කරණ, තේ වතු ආශ්‍රිත බෝග වගා, තේ කර්මාන්තශාලා නවීකරණය හා තේ අපනයන ප්‍රවර්ධන රාජ්‍ය අමාත්‍යාංශයේ ඉදිරි සැලසුම් පිළිබඳව පසුගියදා ජනාධිපති කාර්යාලයේ පැවති සාකච්ඡාවේදී ඔවුන් මේ කරුණු සඳහන් කළ බව ජනාධිපති  මාධ්‍ය අංශය පවසයි.

ඒ අනුව, පාඩු ලැබීමට සහ අකර්මණ්‍යයට හේතු කෙටි කලකදී  හඳුනාගෙන ස්ථීර විසඳුම් දීමට ජනාධිපතිවරයා උපදෙස් දී ඇති අතර, පාඩු ලබන වතු සමාගම් නියාමන ව්‍යාපෘතියක් ලෙස කුඩා තේ වතු හිමියන්ට පවරා සක්‍රීයත්වයට පත් කිරීමටද  තීරණය කෙරී ඇත.

එහිදී පාඩු ලබන වතු නිරීක්ෂණය කර තේ අපනයනය සහ ආදායම නැංවීමට දිගු, මධ්‍ය සහ කෙටි කාලීන සැලසුම් ක්‍රියාත්මක කළයුතු යැයි ක්ෂේත්‍රයේ ප්‍රවීණයෝ පෙන්වාදී තිබේ. කර්මාන්තයේ බිද වැටීමට හේතු වූ සාධක හඳුනාගෙන ලෝක වෙළෙඳපොළෙහි ශ්‍රී ලංකා තේ (Ceylon Tea) සඳහා තිබූ ඉහළ ඉල්ලුම නැවත අත්කරගැනීම ඉලක්කය විය යුතු බව ජනාධිපතිතුමා පවසා ඇත.

එසේම ඉහළ අස්වැන්නක් සඳහා තේ වතු ප්‍රතිසංස්කරණය කොට නැවත වගාව ක්‍රමවත් කිරීමේ අවශ්‍යතාව  දීර්ඝ ලෙස සාකච්ඡා වූ බව ජනපති මාධ්‍ය අංශය පවසයි.

තේ පිළිබඳ නව පර්යේෂණවල සොයා ගැනීම් ප්‍රයෝජනයට නොගැනීම කර්මාන්තයේ පසුබැසීමට හේතු වී ඇති බව ප්‍රවීණයන්ගේ අදහස වී තිබේ. පර්යේෂණ සඳහා ප්‍රමුඛත්වය දෙමින් නව වෙළෙඳපොළ හඹා යෑමේ අවශ්‍යතාව ඔවුන් මෙහිදී පෙන්වා දී ඇත.

විශේෂයෙන්ම ලෝක වෙළෙඳපොළේ ඉහළ ඉල්ලුමක් ඇති Bio Tea (ජෛව තේ) කර්මාන්තය ව්‍යාප්ත කරමින් ලාභ ඉපැයීමේ හැකියාව කෙරෙහි ද අවධානය යොමු ව තිබේ. ඒ අනුව වැවිලි කළමනාකරණ සහ නිරීක්ෂණ අංශය ශක්තිමත් කිරීමේ අවශ්‍යතාව  ජනාධිපතිතුමා පෙන්වා දුන් බව මාධ්‍ය අංශය සඳහන් කරයි.

මේ අතර, මාර්ග, රෝහල්, පාසල් සහ සනීපාරක්ෂාව ඇතුළු යටිතල පහසුකම් රජයේ මෙහෙයවීමෙන් සම්පාදනය කොට තිබියදී  වතු සමාගම් පාඩු ලැබීම ගැඹුරින් විමර්ශණය  කළ යුතු බව ආර්ථික පුනර්ජීවනය පිළිබඳ ජනාධිපති කාර්ය සාධක බලකායේ ප්‍රධානී බැසිල් රාජපක්ෂ මහතා මෙම සාකච්ඡාවේදී පවසා ඇත.

එසේම තේ පැල අස්වනු නෙළන තෙක් වගාකරුවන්ට ස්වයං රැකියාවක හෝ වෙනත් ජීවනෝපායක හෝ නිරතවීමට සහන සැලසීමේ අවශ්‍යතාවද ඒ මහතා පෙන්වා දී තිබේ.

මේ අතර, කොවිඩ් වසංගතය හමුවේ ඇඳිරි නීතිය පනවා තිබූ කාලයේ දී රජය ගත් තීරණ හේතුවෙන් හාරලක්ෂ විසි එක් දහසකට ආසන්න කුඩා තේ වතු හිමියන් ආරක්ෂා වූ බව පැවසූ කුඩා තේ වතු නියෝජිතයෝ ඒ පිළිබඳව ජනාධිපතිතුමාට ප්‍රශංසාව පළ කළ බවත් ජනාධිපති මාධ්‍ය අංශය පවසයි.

අමාත්‍ය රමේෂ් පතිරණ, රාජ්‍ය අමාත්‍ය කනක හේරත්, ආර්ථික පුනර්ජීවනය පිළිබඳ ජනාධිපති කාර්ය සාධක බලකායේ ප්‍රධානී බැසිල් රාජපක්ෂ, ජනාධිපති ලේකම් පී.බී. ජයසුන්දර, කැබිනට් සහ රාජ්‍ය අමාත්‍යාංශවල  ලේකම්වරු, රේඛීය ආයතනවල නිලධාරීහූ, වතු නියෝජිතයෝ සහ තේ වැවිලිකරුවෝ සාකච්ඡාවට එක්ව තිබේ.

Visits: 142